Заев-Корчак: Македонија ја има поддршката од Словачка за евроатланските интеграции

Словачкиот министер за надворешни работи Иван Корчак попладнево на премиерот Зоран Заев му пренел дека Македонија ја има поддршката од Словачка за членство во НАТО и интеграција во Европската унија.

Во соопштението од Владата се наведува дека словачкиот министер ги поздравил демократските промени во Македонија и чекорите кон остварување на стратешките евроатлански интеграции. Корчок оценил дека доколку македонската Влада продолжи со ова темпо на реформите, посебно во правосудството, владеењето на правото и развојот на регионалната сорабтка, тогаш ќе направи исчекори во евроатланските интегративни цели.

Премиерот Заев изразил надеж дека Македонија ќе биде следната држава членка на НАТО.

- Се надеваме дека Република Македонија ќе биде следната 30-та земја членка на НАТО. За нас е големо охрабрување членството на Република Црна Гора што покажува дека ако се има политичка волја, може да се постигнат резултати, истакнал Заев.

Тој посочил дека во тек е имплементацијата на Планот 3-6-9 кој е важен за европските интеграции и за подобрување на квалитетот на животот на граѓаните.

- Работиме на важните судски реформи, на реформи на тајните служби, за професионални медиуми и државни институции, низ соработка со граѓанскиот сектор, во насока на развој на вистинско демократско општество. Вишеградската група е голем поддржувач на Република Македонија и на регионот на патот кон ЕУ, а Република Словачка мотивира со напредокот, рекол Заев.

Македонскиот премиер изразил благодарност за континуираната поддршка од Словачка за евроатланските интегративни процеси на Македонија.

На средбата, на која присуствувале и досегашниот словачки амбасадор Мартин Безак и идниот словачки амбасадор Хенрик Маркуш, споделени се искуства за НАТО интеграциите на Словачка, како и за реформските чекори што ги има направено во делот на транспаретното и отчетно владеење. Соговорниците констатирале дека се создадени услови за поголема економска соработка меѓу двете земји