Во тетовскиот регион 58 сообраќајни несреќи во јануари

Еден загинат,  еден тешко повреден и  44 лица со телесни повреди како и материјална штета од над два милиони и седумстотини илјади денари, се последиците од вкупно 58 сообраќајни несреќи што во јануари се случиле на патиштата во Тетово и тетовско, информираше денеска портпаролот на СВР Тетово Марјан Јосифовски. Бројката на сообраќајки е за десет поголема во однос на истиот период лани.

Според полициските податоци, најмногу од несреќите, односно 33, се случиле во населени места, а останатите  25 на отворен пат додека сообраќајно најризични и натаму остануваат тетовските улици и автопатот.  Најчести причини за овие сообраќајки се  неприлагодена брзина и пребрзо возење (18 несреќи), неправилно вршење дејство (6), недавање првенство (5), недржење растојание (2), недржење страна (2 ) итн.

- Во овој период регистрирани се и 12 излегувања односно излетувања од коловоз како последица на неприлагодување на брзината според условите на патот и пребрзо возење, а четири несреќи биле предизвикани од животни пред се кучињата-скитници  кои неконтролирано се движеле по автопатот Гостивар-Тетово-Скопје како резултат на нефункционалната заштитна ограда долж оваа сообраќајница,  рече Јосифовски.