Викендот помалку тестирани и заболени од коронавирус

Викендот како и минатите саботи и недели бројот на тестирани и заболени од коронавирусот значително намален под 10 проценти на позитивни од Ковид-19 од тестираните. Во петокот и во саботата аплицирани се вкупно 3.250 дози вакцини, од кои 884 се аплицирани како прва доза, 2.257 се ревакцинирани, а 109 граѓани примиле трета доза вакцина.

За разлика од работните денови кога процентот на заболени од коронавирусот се движи над 10 до 15 отсто од тестираните, во неделата на изборниот ден, регистрирани се 107 позитивни на SARS CoV-2 од 1667 тестирани, односно 6,4 проценти.

Министерството за здравство во вчерашниот извештај регистрира и 247 оздравени пациенти, а пријавени се 19 починати лица или вкупно од почетокот на пандемијата 6.964 починати од коронавирусот.

Од починатите, 12 се од Скопје, на возраст 86г, 84, 80г, 75г, 75г, 73г, 67г,65г,63г, 57г, 48г и 39г, две починати лица од Куманово 71г и 42г и по едно починато лице од Богданци 70г, Велес 73г, Гевгелија 69г, Кичево 69г и Македонска Каменица 87г. Сите пријавени лица се починати во болнички услови. Дополнително, согласно Регистарот, умрени лица со дијагноза КОВИД-19 од Мој Термин, од Министерството соопштија дека пријавени се уште пет починати лица, со датум на смрт од 16 септември 2021 до 4 октомври 2021 година. Од нив двајца починати се од Скопје, и по едно починато лице од Тетово, Гевгелија и Велес, на возраст од 59 до 79 години. Од пријавените лица три се починати во болнички услови, а две во домашни услови.

Според епидемиолошки анализи во моментов, дистрибуцијата по градови на активни случаи на коронавирусот е следна: Скопје – 3447, Куманово – 550, Велес – 315, Охрид – 227, Прилеп – 214, Штип и Струмица – 193 , Битола – 191…

Вкупната бројка на Ковид-дијагностицирани лица во нашата земја од почетокот на епидемијата изнесува 197.197. Бројката на оздравени пациенти е 183.474, на починати е 6.964, а бројот на активни случаи изнесува 6.759.

Заклучно со 16 октомври вкупно се вакцинирани 799.012 граѓани, ревакцинирани се 760.317, а трета доза примиле 1.148 граѓани. Педест и четири проценти од граѓаните над 40 годишна возраст се ревакцинирани, а 33 отсто од популацијата од 18 до 39 години примиле барем една доза вакцина.

Опфатот со вакцинација со една доза вакцина, на полнолетната популација е 47 проценти , а со две дози опфатени се 45 отсто од граѓаните над 18 години. Според бројот на аплицирани вакцини, 38 проценти од целата популација во нашата земја е вакцинирана, а 35 отсто од популацијата во државата примила две дози вакцина.

Претседателката на Европската комисија Урсула фон дер Лајен вчера изјави дека во ЕУ повеќе од 75 проценти од возрасните граѓани се веќе целосно вакцинирани против Ковид-19.

Таа додаде дека до вчера, ЕУ извезла повеќе од милијарда дози вакцина во повеќе од 150 земји во светот. ЕУ е најголемиот извозник на вакцини, рече претседателката на Еврокомисијата. Според неа, секоја втора вакцина произведена во Европа била за извоз.

Фон дер Лајен објасни дека целта е до следната година 70 проценти од луѓето ширум светот да бидат вакцинирани против новата болест. Таа потсетува дека Ковид-19 може да се победи само со борба насекаде и најави дека ЕУ ќе донира најмалку 500 милиони дози за најзагрозените земји во следните неколку месеци.

Портпаролот на ЕК во меѓувреме соопшти дека во Унијата досега се издадени 591 милион ковид-сертификати.

Комисијата денеска го усвои извештајот за Дигиталниот сертификат за ковид на ЕУ и неговата имплементација низ ЕУ. Извештајот покажува дека сертификатот на ЕУ е клучен елемент во одговорот на Европа на пандемијата на Ковид-19, со генерирани повеќе од 591 милион сертификати.

Податоците на ЕК покажуваат дека сертификатите придонеле за двојно зголемување на бројот на цивилни летови во јули во споредба со истиот месец минатата година. Според портпаролот, европските сертификати се признаваат во 43 земји, од кои 16 се надвор од ЕУ. Тој додаде дека 60 странски земји сакаат да се поврзат со европскиот систем за сертификатите за да обезбедат меѓусебно признавање со нивните сертификати за вакцинирани, прележани и тестирани.