Свет
4. December 2017 - 18:55

Столтенберг: Војната на Корејскиот полуостров би била катастрофална

 Генералниот секретар на НАТО Јанс Столтенберг денеска предупреди дека војната на Корејскиот полуостров би била катастрофална, но нагласи дека Алијансата има средства со кои би одговорила на нуклеарните и ракетни напади, кога тие би биле изведени.

Столтенберг тоа го изјави на новинарите во Брисел речиси една недела откако Северна Кореја го изведе најновиот тест со нова интерконтинентална балистичка ракета со голем дострел, Квасонг-15.

Северна Кореја соопшти дека таа ракета е најмоќна која официјален Пјонгјанг досега ја има лансирано и дека може да го погоди  американското копно, што потврди и официјален Сеул.

Столтенберг нагласи дека „таа војна во регионот би била катастрофална и дека би имала глобални последици“, но и дека 29-члената Алијанса е „силна и обединета“ и „НАТО е во можност да одговори на каков било напад, вклучувајќи и балистички и нуклеарни напади“.  

- Алијансата ќе работи со своите партнери во регионот и „ќе продолжи да врши максимален притисок на Северна Кореја“, рече Столтенберг.