СП У-19: Македонија во осминафиналето против Португалија
Македонската кадетска репрезентација со пораз ја заврши групната фаза на СП во ракомет што се игра во Скопје и во осминафиналето ќе игра против селекцијата на Португалија во утрешниот термин од 20.45.ч.
Неочекувано тежок пораз на нашите репрезентативци од селекцијата на Јапонија со 31-22 во меч во кој шаблонската игра на избраниците на Брестовац не можеше да се спротистави на техничката перфекција и борбеноста на самураите.
Самиот почеток на мечот го најави ваквиот епилог откако Македонија во првите 9 минути не успеа да постигне погодок па противникот направи предност од 6-0 која до крајот на мечот нашите млади ракометари не успеаја да ја загрозат. Костески со 8 погодоци и Серафимов со четири беа најефикасни во нашиот тим. Костески е и прв стрелец на Мундијалот по групната фаза со 40 погодоци пред Серафимов кој е втор со 37.
Нашиот противник во осминафиналето Португалија има перфектен учинок во групната фаза каде пријатно изненади со 5 победи и тоа во дуелите со Германија, Исланд, Србија, Тунис и Бразил.
Мечот Македонија – Португалија ќе се одигра утре со почеток во 20.45ч во спортската сала Борис Трајковски.
-
Зоран Николовски
Сите содржини од овој новинар