Шкендија со пресврт, но и два пенали го победи Работнички

Со натпреварот Работнички - Шкендија одигран попладнево во Скопје, комплетирано е 14.коло во ПМФЛ. 

 

На средбата одиграна на националната арена „Тодор Проевски“ гостите од Тетово иако имаа негатива во првиот дел, но сепак со два гола од пенал забележаа победа со 2:1. 

 

Работнички одлично го отвори дуелот и уште во 6.минута поиведе со 1:0 со погодокот на Николче Шаркоски. 

 

Сепак радоста на „Романтичарите“ не траеше долго. Само 12-минути подоцна судијата Александар Ставрев покажа на белата точка, а сигурен егзекутор на најстрогата казна беше Агим Ибраими за израмнување на 1:1.

 

Во вториот дел. Домаќините останаа со играч помалку, откако Сиљановски во 78-минута го заработи вториот жолт картон, по што беше исклучен. Бројчаната предност Шкендија ја искористи дури во судиското дополнение кога одново Ставрев досуди пенал, а Ибраими по втор пат беше прецизен. 

 

 Со трите освоени бодови и вкупно 21 колку што има и Силекс, екипата на Шкендија сега се проби на третото место на табелата, поради подобрата гол разлика во однос на Кратовци. Лидерот Вардар кој вчера загуби на гостувањето во Струга има 30 бодови, а второпласираната екипа на Академија Пандев која одигра нерешено со Ренова има 26 бодови. 

 

Во прволигашката конкуренција претстои пауза поради настапот на репрезентацијата во евро-квалификациите и двата последни дуели со Австрија на гости и Израел во Скопје, додека следното коло во Првата лига ќе се игра на  21 ноември.