Македонија
10. April 2022 - 8:35

Се очекува поинтензивна кампања за вакцинација против Ковид-19

Продолжува трендот на намалување на бројот на активни ковид случаи во државава. Според вчера објавениот извештај на Институтот за јавно здравје, активни се 1.351 случај од кои најголем број – 715 се во Скопје.

При направени 2.669 тестови, регистрирани се 149 нови случаи со КОВИД-19, еден починат и 223 оздравени пациенти.

Вкупниот број КОВИД-дијагностицирани лица во земјава од почетокот на епидемијата изнесува 307.654, бројот на оздравени пациенти е 297.059, а на починати е 9.244.

Препораките на Комисијата за заразни болести за укинување на задолжителното носење на маски во затворен простор, со исклучок на здравствените установи, домовите кои згрижуваат постари лица, аптеките и јавниот превоз, на епидемиолошкото следење на контактите и последователната препорака за изолација на контактите, како и укинување на носењето маски за учениците во средните училишта и да се овозможи организирање екскурзии за учениците во основните и средните училишта, се очекува деновиве да бидат разгледани од Главниот координативен кризен штаб, а откако ќе бидат усвоени од сите членови ќе бидат ставени на седница на Владата.

Сепак новите препораки и очекуваните следни мерки на олеснување од рестрикциите, како што истакнуваат надлежните, не значат дека пандемијата е завршена и се очекува да се организира поинтензивна кампања за вакцинација против Ковид-19.