Свет
14. December 2017 - 22:08

САД го обвини Иран дека стои зад ракетниот напад врз Саудиска Арабија

 Американската амбасадорка во Обединетите нации Ники Хејли денеска одржа прес конференција на која го обвини Иран дека стои зад неодаменшниот ракетен напад врз Саудиска Арабија.

Хејли прес конференцијата ја одржа пред остаток од проектилот што јеменска шиитска вооружена група го истрела кон аеродромот во саудискиот главен град Ријад, и рече дека вмешаноста на Иран во инцидентот е несомнена.

- Имаме несоборливи докази дека Иран намерно ги крши своите меѓународни обврски и дека се обиде, но не успеа, да ја прикрие својата вмешаност. Оваа ракета била направена во Иран, испорачана на Хути герилците, кои ја истрелаа врз цивилен аеродром каде можеше да убие стотици недолжни цивили, изјави Хејли.

Иран и Саудиска Арабија се вклучени во низа воени конфликти во регионот, и во граѓанската војна во Јемен, Иран ја поддржува шиитската заедница Хути, додека Саудиска Арабија е на страна на сунитската Влада. Саудиска Арабија воведе ембарго врз Јемен со цел да го спречи Иран да ги вооружува Хутите, но го обвини Иран дека сепак успеал да внесе балистички проектили со кои Хутите сега им се закануваат на саудиските градови.

Портпаролот на иранската мисија во Обединетите нации Алиреза Мирјусефи ги негираше тврдењата на амбасадорката Хејли.

- Американската Влада има своја агенда и постојано работи на тоа да ја измами јавноста. Целта на овие обвинувања е да се тргне вниманието на јавноста од разурнувачката војна која Саудиска Арабија ја води во Јемен, со поддршка на израелскиот режим, изјави тој.

Изјавата на Хејли доаѓа во време кога САД најавуваат повлекување од договорот со кој Иран се обврза да ја суспендира својата нуклеарна програма и да го запре развојот на балистичките ракети на осум години во замена за олеснување на економските санкции. Администрацијата на претседателот Доналд Трамп зазема далеку поостар став кон Иран во споредба со администрацијата на Барак Обама, и упатува изрази на поддршка на Саудиска Арабија, другите сунитски арапски држави, и на Израел, во справувањето со иранските закани во регионот.