Балкан
13. October 2020 - 15:17

Најмалку 44 лица умреле за неколку дена од труење со алкохол во Турција

Минатата недела 44 лица починале од труење со нелегален алкохол во Турција , објави „Ројтерс“. Поради зголемувањето на цените на алкохолот поради зголемувањето на даноците, турските граѓани сè повеќе се свртуваат кон поевтин домашен алкохол.

Првите смртни случаи се регистрирани во западната провинција Измир, каде што починале 18 лица. И државната телевизија ТРТ објави дека уште седум лица ширум земјата починале од труење со шверцуван алкохол.

Полицијата привела 58 лица поврзани со производство и продажба на нелегален алкохол. На осуммина им е одреден притвор до почетокот на судењето.

Министерството за внатрешни работи соопшти дека полицијата се сомнева дека некои жртви користеле средства за чистење за производство на алкохолни пијалаци.

Турските власти воведоа високи даноци за алкохол. Во последните десет години цената на пивото се зголеми за 365 проценти, а националниот пијалак раки за 443 проценти. А Владата во јули го зголеми данокот на пијалаци за 6,9 проценти.