Македонија и Косово ја продлабочуваат царинската соработка за побрза трговија и посигурни граници

Зајакнување на оперативната соработка, побрза размена на податоци, олеснување на трговијата и унапредување на безбедноста на границата беа во фокусот на билатералната средба на царинските управи на Македонија и Косово, одржана во Приштина.

-Особено внимание беше посветено на One-Stop Shop концептот на граничниот премин Блаце – Хани и Елезит, како заедничка иницијатива која има за цел поедноставување на процедурите и побрз проток на стока и патници. Двете страни разговараа и за унапредување на размената на податоци преку SEED, усогласување на процедурите и подобрување на инфраструктурата и капацитетите на граничните премини, се наведува во соопштението од Царинската управа.

Во делот на европската интеграција, биле разменети искуства и информации за реформите и дигитализацијата на царинското работење, вклучително и подготовките за усогласување со европските системи и стандарди.

Важен дел од разговорите бил посветен и на зајакнувањето на соработката во областа на царинското разузнавање и размената на информации, со цел побрзо откривање и спречување на царински измами, криумчарење и други форми на прекуграничен криминал.

-Границата треба да биде што е можно поедноставна за легалната трговија и патниците, а истовремено силна и ефикасна бариера против криминалот. Преку навремена размена на информации, дигитални алатки и меѓусебна доверба можеме дополнително да ја зајакнеме соработката и да придонесеме за поголема безбедност и олеснување на трговијата во регионот- истакнал директорот на Царинската управа Бобан Николовски.

Двете царински управи ја потврдиле подготвеноста за понатамошно продлабочување на билатералната соработка и реализација на конкретни активности за поефикасни царински постапки, олеснување на трговијата, зајакнување на безбедноста и поддршка на европската интеграција на регионот.

МИА