Интернет
29. January 2016 - 10:55

Фејсбук ги воведува новите функционалности на популарната опција Лајк

 
Најпопуларната социјална мрежа, Facebook наскоро ќе ги воведе новите функционалности на популарната опција Like. Иако многумина посакуваа опција Dislike, социјалната мрежа ќе ја воведе верзијата Reactions, која во следниот период ќе стане достапна за корисниците на мрежата ширум светот.
 
Компанијата уште во октомври објави дека ги тестира Reactions, кои во основа се шест емотикони кои им овозможуваат на корисниците да прикажат широк спектар на емоции во коментарите и постовите. Дел од новите опции на Like функцијата ќе бидат „лутината“, „тагата“, „радоста“, „смеењето“, „изненаденост“ и „љубов“.
 
Првично, во рамките на тест периодот, Reactions беа достапни само за корисниците во Ирска и во Шпанија.
 
Марк Закерберг при воведувањето на овие опции изјави дека „лајкот“ не е секогаш соодветен во комуникацијата, бидејќи понекогаш корисниците сакаат да изразат разбирање и сочувство.
 
Дневно на Facebook се „лајкува“ повеќе од шест милијарди пати, па тоа е исклучително важна функција за мрежата, како и за сите компании кои на тој начин комуницираат со публиката и корисниците.