Блажевиќ предизвика „земјотрес“ во Португалија!!!

Поранешниот хрватски тренер, Мирослав Ќиро Блажевиќ ги обвини Португалците дека нивните клубови и репрезентацијата во минатото купувале натпревари.

 

„Тренерот на сите тренери“ во разговор за српскиот весник „Курир“, во најавата за натпреварот помеѓу Хрватска и Португалија во осминафиналето на ЕП, изнел обвинувања кои силно одекнаа во Португалија од каде стигнаа најави за тужби против славниот тренер.

 

„Не ме интересира Португалија. Против кого и да играат навивам против нив од лични причини. Знаете зошто? Затоа што купуваат натпревари“, рекол Блажевиќ и дополнил:

 

„Го предводев Динамо во 1982 година против Спортинг, тогаш тие го купија тој натпревар. Во баражот за ЕУРО 2008, Португалија ги купи натпреварите против Босна и Херцеговина. Ова е вистина, сигурно нема да ме уапсат? Доколку имаат чест нека дојдат и нека ми кажат в лице дека не купувале“.

 

Во 1982 година Динамо испадна од Спортинг, кој во реваншот победил 3-0, откако загрепскиот тим на првиот меч славел 1-0. На изјавите на 81-годишниот тренер веднаш реагирале од славниот португалски клуб најавувајќи тужба против Блажевиќ.

 

„Господинот Блажевиќ е оптоварен со омраза и е многу лош човек. Доколку има некаков кредибилитет, со искуството кое го поседува, сигурно ќе можеше да и помогне на Хрватска за мечот со Португалија, но се чини дека тој нема таков кредибилитет“, стои во дел од соопштението од Спортинг.